TË MIRËPRESËSH VIZITORËT SI MIQ!

Vlerësimet në internet janë “veza e artë” për biznesin tuaj.

Të gjithë pronarët e akomodimeve private, mendojnë se qëllimi i vetëm është të ofrojnë një strehim sa më cilësor dhe të rehatshëm për vizitorët, brenda mundësive të tyre.
Sigurisht që ambienti akomodues është i rëndesishëm për vizitorët, që në momentin e përzgjedhjes në kanalet e shitjeve. Vizitorët përzgjedhin vendndodhjen, komoditetin, fotot e bukura, por ajo që u kushtojnë shumë vëmendje janë vlerësimet nga vizitorët e tjerë.
Në një mjedis konkurrues ku ka me shumicë prona akomoduese gjithnjë e me të bukura, vizitorët duan të ndihen të mirëpritur.
Për pronarët nuk është e thjeshtë tu përshtaten të gjitha kërkesave të vizitorëve: Pastëria, rehatia dhe komoditeti, siguria e ambientit, pajisjet e nevojshme në dhomë dhe tualet, janë bazike. Por vizitorët kanë nevojë për vëmendje dhe të qenurit në dispozicion, të trajtohen nga pronarët si miq të dashur. Të krijuarit e një komunikimi të mirë me vizitorët,i bën ata të ndihen të rëndesishëm, të mirëpritur dhe çdo gjë bëhet më e lehtë, madje dhe disa gabime mund të anashkalohen.

“Fjala e mirë, zbut dhe gurin”.

Ka vetëm dy lloje të vizitorëve që lënë vlerësime; ata të etur për të lëvduar pronën tuaj dhe ata që synojnë ta kritikojnë atë. Të dy grupet kërkojnë një qasje të ngjashme: Përgjigje sa më të shpejtë, miqësore dhe të mirëmenduar.
Teknikisht, ekziston një grup i tretë dhe këta janë vizitorët që nuk lënë asnjë koment. Janë ata që paraqesin një mundësi të madhe për pronën tuaj. Nëse mund ta inkurajoni këtë kontigjent të madh për të postuar komente, ju keni një shans jo vetëm që të rrisni vlerësimin tuaj, por edhe arritjen tuaj në shumë platforma në internet.
Në “industrinë e mikpritjes”, reputacioni ndikon drejtpërdrejt në suksesin tuaj afatgjatë.

6 statistika që duhet të dini për vlerësimet në internet:

• 96% e vizitorëve shikojnë vlerësimet kur kërkojnë për një vend akomodimi.
  
• 88% e tyre filtrojnë hotelet me një vlerësim mesatar nën 3 yje.
  
• 32% eliminojnë ata me një vlerësim nën katër.
  
• 79% do të lexojnë rreth 6 deri në 12 riview, para se të marrin një vendim rezervimi.
  
• 4 nga 5 besojnë se një hotel që i përgjigjet vlerësimeve në internet, kujdeset më shumë për klientët e tij.
  
• 85% pajtohen që një përgjigje e menduar mirë nga pronari për vlerësimin në internet, do të përmirësojë përshtypjen e tyre për akomodimin.