Si t’i përgjigjeni komenteve negative të vizitorëve?

A e dini se sot 84% e njerëzve u besojnë review-ve po aq sa rekomandimet që marrin nga njerëzit për atë ambient akomodimi?

Review-të e vizitorëve që qëndrojnë në akomodimin tuaj luajnë një rol të madh në tërheqjen e vizitorëve të rinj. Duhet t’u përgjigjeni të gjitha vlerësimeve që merrni, pavarësisht nëse janë të mira apo të këqija.
Kur ambienti nuk është në pritshmëritë e vizitorëve dhe nuk përkon me përshkrimin e vendosur në kanalet e shitjeve ka të ngjarë që vizitorët të shkruajnë një review të keqe.

Për pronarët e akomodimeve private, një review negativ mund të jetë një dekurajim i madh. Gjithmonë duhet të keni parasysh se ju nuk jeni vetëm duke iu përgjigjur një komenti për atë vizitore, por për të gjithë vizitorët e ardhshëm  që mund ta lexojnë atë përgjigje.
Nëse vizitori ka shkruar diçka që nuk është e vërtetë, atëherë sigurisht që ju do ta mohoni me mirësjellje dhe do t’i tregoni të gjithëve se çfarë ka ndodhur në të vërtetë.

Rregulli numër 1. Gjithmonë falenderoni vizitorët që kanë lënë një review.
Duke iu përgjigjur rregullisht dhe sinqerisht të gjitha vlerësimeve, ju po tregoni se kujdeseni për vizitorët  tuaj dhe se interesoheni për mendimet e tyre. Përmes review-ve të vizitorëve ju mund të merrni një pasqyrë të asaj që potencialisht duhet të ndryshohet për të përmirësuar cilësinë e pronës dhe shërbimeve tuaja.

Meqenëse komentet e vizitorëve nuk janë gjithmonë pozitive, kjo është një arsye shtesë për t’iu përgjigjur dhe shpjeguar situatën nga këndvështrimi juaj. Mos harroni se në këtë mënyrë krijoni një reputacion pozitiv me vizitorë të mundshëm. Filloni çdo përgjigje duke falënderuar vizitorin për qëndrimin në akomodimin tuaj dhe gjithashtu falenderojeni për lënien e komenteve.

Rregulli numër 2. Asnjëherë mos filloni me një argument
Pavarësisht nëse komenti i vizitorit është i vërtetë apo jo, përgjigjja juaj duhet të jetë gjithmonë profesionale, sa më objektive dhe miqësore, siç i përshtatet vizitorit. Mos u përfshini në grindje me vizitorin qe ka shkruar review, thjesht shkurtimisht përshkruani pikëpamjen tuaj për ngjarjen.

Rregulli numër 3. Kujtojini vizitorit zgjidhjet e ofruara
Kur u përgjigjeni komenteve negative, mos harroni të përmendni se keni bërë çmos për të zgjidhur situatën. Përshkruani të gjithë komunikimin qe keni zhvilluar, rregullimet e shpejta, zëvendësimin e pajisjeve të prishura – shkurtimisht të gjitha zgjidhjet që ju i ofronit atyre ndërsa ata qëndronin te ambienti juaj i akomodimit.

Rregulla numër 4. Komunikimi është çelësi
Skenari më i keq për një pronar është që vizitori të mos e informojë atë për problemin që mund të ketë pasur gjatë qendrimit dhe pronari ta zbulojë atë nga review-të . Në këtë rast pronari nuk ka një shans për të zgjidhur situaten. Eshtë më mirë të tregoni në check-in se ata mund t’ju kontaktojnë gjithmonë për ndihmë në rast të ndonjë problemi.

Mënyra se si ju përgjigjeni ndaj review-ve negative, ju ofron mundësinë të tregoni se cfarë host-i ( pronar i akomodimeve private ) jeni në të vërtetë. Nga angazhimi që ju tregoni, klientët e mundshëm do të shohin që ju i merrni seriozisht komentet e vizitorëve dhe se dëshironi të ofroni një shërbim të shkëlqyerë.
Meqenëse njerëzit zakonisht janë më të interesuar për vlerësime negative, ka shumë mundësi që edhe ata të lexojnë përgjigjen tuaj. Përdorni këtë mundësi dhe ktheni situatën në avantazhin tuaj.

Vizitorët zakonisht lënë komente në faqet e prenotimit si Booking.com dhe Airbnb. Ata gjithashtu përdorin Google Maps për të lënë komente. Kontrolloni rregullisht vlerësimet për akomodimin tuaj në të gjitha platformat dhe përgjigjuni atyre.